من خلال فقرة “مشاهير في الكوزينة”، نقدم لكِ متتبعة مجلة “خميسة.ma”، و قراء جريدة “le 12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج و الزوجة في تحمل أعباء “الكوزينة”.
حلقة اليوم مع الحائز على لقب برنامج إكتشاف المواهب الكوميدية “ستانداب” في نسخته الثانية “سفيان نعوم” :
– بداية بغينا نعرفوا واش كتعاون مرآتك في الكوزينة في رمضان ؟
هذا ضروري و واجب علينا..خاصنا نتعاونوا مع عيالاتنا وخا هما متيحملوناش ندخلو معاهم للكوزينة حيت هما عزيزة عليهم الكوزينة..و مهما درنا تيجريو علينا..
– إلا سولناك أشنو تتوجدوا لطبلة رمضان، أش غادي يكون الجواب ديالك ؟
الحوت ضروري في الطبلة، الحريرة، شلاضة، التمر، الحليب و العصير.. طبلة رمضان عادية سوسية محضة…
– أشنو الشهيوة لي كنعرف طيبها في رمضان ؟
نعرف نطيب الطاجين.. لكن لي عزيزة عليا سباكيتي و تنعرف نصايبها بالكفتة.. تناخدو الكفتة و البلصة و الثوم و العطرية و la sauce tomate..قبل تنصلقوا سباكيتي في الما و تنديرو معها شوية الزبدة باش متلصقش. و نخلطوا كلشي و تنديرو فوقها الفرماج الأحمر.. طبق ساهل..
– أشنو تقول للمغاربة في هذا رمضان ؟
بغيت نقول للمغاربة رمضان مبارك سعيد يدخل على الجميع بالصحة و العافية، و بغيت المغاربة يكونوا متسامحين و يبعدوا من الأنانية و يتاحدوا فيما بيناتهم ماشي كل واحد يقول أراسي..خاصنا نبغيوا بعضنا البعض باش نزيدوا ببلادنا القدام و الله يزول علينا هذه الغمة.. آمين….