بخصوص موضوع السفر الى تركيا، او الفرق بينها او بين المغرب، بغيت نشارك معاكم تجريبتي, عطلة لمدة 41 يوم لشخصين في تركيا باقل من 20000 درهم.

اولا الكرا : ماكوناش تنباتو في لوطيلات تايجيوني مزيريين، كونا تنكريو من إربي إنبي، كارصونيير فيها كولشي نقية بالكوزينة بالماعن ماكينة الصابون، ارخص وحدة كانت ب 150 درهم او اغلى وحدة بـ350 درهم، على حساب الكاغتيي، ولكن القاسم المشترك النقا، او ديما نقرا ڭاع التعاليق في لاپليكاسيون قبل مانكري، الطوطال 12000 درهم.

ثانياً الترانسپور، تدخل لاي مدينة تتشري لاكارط، اسطنبول, كارت شريناها ب 20 درهم، بورصا كارت بـ13 درهم، تتشارجيها تتركب بيها في الطوبيس, الترام الباطو الميترو, كولشي ب 4 الدراهم, او ماشي مشكل المسافة, شدينا, الباطو ساعة او نص من الشمال حتال الجنوب ب 4 الدراهم, بعض الناس ماعارفينش تاياخدو دورة ديال البوسفور ب 500 درهم نص ساعة او ماتايشوفو والو, حنا غادين جايين حتى حكينا الساحل الاوروپي او الاسيوي برا و بحرا او كولشي ب 4 الدراهم للڤواياج, بالنسبة للترانسپور من اسطنبول لبورصة باطو تايدير ساعتين ب 50 درهم, الطيارة لطرابزون 1000 درهم ألي روتور, الطوبيس من وسط اسطنبول للمطار ب 9 الدراهم, الطوطال ترانسپور وسط المدن او بيناتهم طلع بـ3000 درهم.

بالنسبة للسمانة ديال العيد الكبير كان الترانسپور كولو فابور لڭاع الناس او حتى السياح, او كانت سمانة ديال الكونجي في تركيا كاملة, باش يشجعو الناس تخرج او تسارا او الشعب يرجع للخدمة ناشط, او بالنسبة الا كنتي  سائح ماعمرك اتحتاج تسول، يكفي تكتب سميت البلاصة لي باغي تمشي ليها في ڭوڭل ماپص, او الپوزيسيون ديالك, تايعطيك النمرة ديال الطوبيس اولا خط الترام, او معاش ايجي, او ديما عندك عدة اخيارات, على حساب الڭانة ديالك واش باغي تمشي برا ولا بحرا.

ثالثا الاكل: حنا ماعجبناش الاكل التركي مالكتهم باسلة ولكن عموما رخيصة الا بعدتو على الاماكن السياحية, كونا تنكريو ديما بلاصة فيها كويزين إكيپي باش نطيبوا, او التقدية رخيصة بزاف, كاين بزاف الاسواق منتاشرين في كل الاحياء, كاين بيم, شوك, ميڭروص…, فيهم كولشي او المواد الغذائية رخيصة بزاف, او حتى الا بغيتي تاكل على برا, الشاورما تدير 20 درهم, البورڭر 25 حتال 30 درهم, دونك الاكل حوالي 3000 درهم

رابعاً السياحة, للاسف اغلب السياح تايمشيو لنفس الاماكن تقسيم, اية صوفيا الفاتح…, او هادشي باسل حدو سمانة حنا كونا تنخرجوا للبلايص لي تايخرجو ليهم التوارك, اجمل الاحياء في اسطنبول, هي بيشيكتاش, مودا, بايكوز, فيهم پاركات او سواحل رائعة, متاحف, غابات, شواطئ لي خاويين, ولعشاق كرة القدم ضروري تشوفو شي ماتش, التيرانات زوينين او وسط المدينة, حنا شفنا ماتش ديال بيشيكتاش اوصامپدوريا, تتشري پاص ب 50 درهم, فيه تصويرتك, او تدخل بيه لاي ماتش, بالنسبة لبورصا, الا مشيتو ماتزڭلوش طلعو للجبل بالتيليفيريك, تايدير 150 درهم للشخص الواحد, او متحف الفتح, لاربع في الصباح فابور, ضريح عثمان غازي, الا مشيتو ليه ماتزڭلوش تغيير الشيفت ديال الحراسة مع 12 ديال النهار, او ضروري حمام تركي بالماساج, 60 درهم.

رابعا الشوپينڭ, بلاما نهضر على الشوپينڭ بزاف ولكن الا كونتي غادي لتركيا ماتديش معاك الحوايج, كولشي اتشريه من تما, من الملابس الداخلية, حتال الفوطات او ليزور او الاثمنة ديما النص ديال الثمن في المغرب, خصوصا البراندات, تقداو نيشان من المولات كولشي رخيص, من الافضل الا كنتي اتشري حوايج او تجي مثقل بيهم للمغرب, شري ليمارك, اي بوتيك دخلتي ليه اتلقا الثمن نيشان النص ديال الثمن في المغرب.

عموما تركيا بلد جميل جداً, البلديات دايريين خدمتهم, الشعب مرتاح, الشباب موفرين ليهم كولشي, من قرايا من اماكن التسلية, العائلات موفرين ليهم فين يخرجوا يديرو پيكنيكات, او حاليين الفرص للمشاريع او المنافسة الشريفة باش لي عندو شي حاجة يبينها.

تحية للاتراك لي فعلاً قدرو يهزو  البلاد ديالهم  من الحضيض او يخليوها تتنافس الدول الاوروبية في كل المجالات, او الله يرزق المغرب نفس التقدم, حيت عندنا بلاد رائعة بزاف حسن من تركيا, خاص غير لي يهز بيها سياحيا و اقتصاديا.

*سائحة مغربية في تركيا

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *