من خلال فقرة “مشاهير في الكوزينة”، نقدم لكم متتبعات جريدة “خميسة.ma”، و قُراء “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج و الزوجة في تحمل أعباء “الكوزينة”.
حلقة اليوم مع الممثل الذي أبكى المغاربة في مسلسل “بنات العساس” : الممثل منصور بدري “عْزِيزِي الطّيب”
– بداية بغينا نعروفوا واش كتعاون عائلتك في الكوزينة في رمضان ؟
ضروري.. تنعاونهم و تنعاون حتى الواليدة ديالي ملي تنمشي لعندها..في شغالات الكوزينة.. ومعنديش موشكيل ندخل ونعاون راه عادي..خاصة في هذا رمضان..
– إلا سولناك أشنو وجدتوا لطبلة رمضان، أش غادي يكون الجواب ديالك ؟
وجدنا الحريرة.. مسمنات.. سوسيس.. الكبدة مشرملة.. هذا أهم الحوايج لي تنطيبو بالإضافة إلى المواد الرئيسية بحال التمر والحليب والعصير وشلاضة والبريوات..
– أشنو الشهيوة لي كتقن تطيبها في رمضان ؟
آآآه ناويا تحصليني.. تنعرف نطيب 2 لحوايج لي هما أومليط وليبات.. أما بالنسبة الطواجن هذا الشي بزاف عليا.. النيفو طالع..
– أشنو تقول للمغاربة في هذا رمضان ؟
بغيت نقول للمغاربة رمضان كريم بالصحة والسلامة و الله يثبت الصيام والله يغفر الذنوب.. أما بخصوص هذه الضجة لي خلقها وفاة عزيزي الطيب في سلسلة بنات العساس.. هذا من فضل ربي.. و الضجات كلهم مزيانين كيف ما بغاو يكونو.. المهم هو أن الناس تابعات و عجبها المسلسل، و هذا ما كنا نطمح إليه بصراحة.. وهذا يشرفنا.. و أشكرهم على تتبعهم.. و عواشركم مبروكة.