من خلال فقرة “مشاهير في الكوزينة”، نقدم لكم قراء ومتتبعي جريدتي خميسة.ma، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج و الزوجة في تحمل أعباء “الكوزينة”.
حلقة اليوم مع قلب دفاع المنتخب المحلي سفيان بوفتيني :
*بداية بغينا نعرفو واش كتعاون مرآتك خلال شهر رمضان في الكوزينة ؟
ضروري، وخا نعاونها غير بالسكات من النكير..راه طبيعي كل واحد منا خاصوا يعاون عائلتوا، ومفيها حتا عيب أو إحراج إلا الواحد تعاون مع وليداتو.. راه سيد الخلق سيدنا محمد “صلى” وصانا بهاذ الشي، مهم مرة مرة تنهز معها المعان تنوجد الطابلة عادي..
*إلا سولناك اليوم أشنو وجدتو لطبلة فطور رمضان، أش غادي يكون الجواب ديالك؟
أولا ضروري يكون الحوت فوق الطابلة لاني داير واحد الرجيم صارم، حفاظا على الوزن واللياقة حتى من السكر ناقصوا.. بالإضافة لتداريب لي تتكون في رمضان بالليل، وكيف تتعرف الحوت هو الوحيد لي عوضك على كلشي، وانا عزيز عليا الحوت بزاف خاصو ضروري يكون فوق الطابلة ويوميا، أما الأشياء الأخرى عادية الحريرة واخا متنشربهاش.. الحليب التمر..العصير… كيف جميع الشعب المغربي.
*أشنو الشهيوة لي كتقن تطيبها في رمضان؟
تنعرف نطيب الطواجن مزيان يعني نسلك راسي.. وهاد شي جا بالتعلم والتجربة لاني دوزت حوالي 4 أو 5 سنوات ديال “تازوفريت” يعني ضروري تعتامد على راسك وتوجد لراسك متاكل…وهذه السنين قبل منتزوج هي لي خالاتي نعرف نغسل لماعن ونصبن ونطيب….