من خلال فقرة “مشاهير في الكوزينة”، نقدم لكم قراء ومتتبعي جريدتي “خميسة.ma”، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع المغني المغربي صاحب أغنية “الحبيبة مي” سعيد مسكر.
– بداية بغينا نعرفو واش كتعاون مرآتك في الكوزينة في رمضان ؟
في هذا الشهر المبارك غير شوية ماشي بزاف حتى اقرب وقت الفطور تنعوانها في توجاد الطابلة.. نحط الكيسان الحريرة والطباسل.. ومن غير رمضان كنعاونو فكاع أشغال البيت و حتى فالكوزينة لأن العوين ولابدى منو رغم أن عيالاتنا كيهزو علينا كولشي و مكيخليونا نديرو والو ولكن ضروري من تقديم يد المساعدة”
– إلا سولناك أشنو تتوجدوا لطبلة رمضان، أش غادي يكون الجواب ديالك ؟
البغرير ضروري لاني تنحماق عليه.. مكايخطانيش البغرير كل نهار خاص يكون هو والحريرة ضروريين في الطابلة ديالي في رمضان. وشي الأخر عادي حوت مرة دجاج وعصير وشلاضة وانا تنبدا بالتمر والماء.
– أشنو الشهيوة لي كنعرف طيبها بها في رمضان ؟
كيفما قلت مكانعرفش نطيب ومعنديش مع الطياب.. الطبخ بالنسبة لي بحال شي فيلم ديال الخليع هههه.. وإلا حصلت شي مرة تنوجد البيض بالفراماج.
– أشنو تقول للمغاربة في هذا رمضان ؟
بغيت نقول للمغاربة رمضان مبارك سعيد يدخل على الجميع بالصحة والعافية، والله يخرجا من هذه الأزمة ديال كورونا لانها حرماتنا من بزاف ديال الحاجات.. حرماتنا من الزيارات والتجمعات وحرماتنا من المشاركة في الحملات الخيرية لي كانت تتكون في هذا الشهر الفضيل ونتمناو نعيدو هاذ العام مع الأهل والأحباب ونصليو صلاة العيد مجموعين.