من خلال فقرة “مشاهير في الكوزينة”، نقدم لكن متتبعات المجلة النسائية “khmissa.ma“، و قُراء “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج و الزوجة في تحمل أعباء “الكوزينة”.
حلقة اليوم الممثل المغربي عبد القادر عيزون (التيباري) و بطل سلسلة بنات العساس :
– بداية بغينا نعرفوا واش كتعاون عائلتك في الكوزينة في رمضان ؟
لا..لا..متندخلش للكوزينة..معندي مندير فيها..تنعطي لمولات الدار باش يتقداو الشهر كامل و الحمد لله..و لا خارج سوق الكوزينة… متندخلش في هاذ الشي ديال التقدية والمطبخ.. الدار ديال مولات الدار…
– إلا سولناك أشنو تتوجدوا لطبلة رمضان، أش غادي يكون الجواب ديالك ؟
الحمد لله كلشي موجود.. البريوات مسمن..و سمك و الحريرة و القهوة و أتاي والعصير و التمر و الحليب.
– أشنو الشهيوة لي كتقن تطيبها في رمضان ؟
أنا تنعرف نطيب كلشي.. المرقة ديال العرس والطنجية.. كوامل عاديين وتنصايب لوبيا بالتقلية واللوبيا بالكفتة كواري.. المهم عطا الله ما يدار وبزاف ديال الأكلات لي تنعرف نطيب..وراه أحسن طباخ في العالم هو الراجل..
– أشنو تقول للمغاربة في هذا رمضان ؟
بغيت نقول للمغاربة مبروك عيكم سيدنا رمضان..الله يعطيكم الصحيحة ديالكم..و الله يرزقكم الرزق..و الله يبعد علينا هذا الوباء..و الله يخلي لينا سيدنا..الحمد لله المغاربة متاحدين بعضنا و كورونا لن تغلبنا..و احنا غادين باش نغلبوها بإن سيدي ربي..