من خلال فقرة “مشاهير في الكوزينة”، نقدم لكم قراء و متتبعي جريدتي “خميسة.ma”، و “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج والزوجة في تحمل أعباء “الكوزينة”.
حلقة اليوم مع صاحب “أغنية عيشي يا بلادي عيشي” الفنان الكبير محمد الغاوي :
– بداية بغينا نعروفوا واش كتعاون مرآتك في الكوزينة في رمضان ؟
أبدا..متنعاونش في الكوزينة لا في رمضان ولا من غير رمضان.. لأن الكوزينة من اختصاصات المرأة و أنا متنعرف ندير حتى حاجة في الكوزينة..تنتقدى من السوق و تنجيب كل ما يلزم في الدار لكن الكوزينة عليا بالتقار..
– إلا سولناك أشنو تتوجدوا لطبلة رمضان، أش غادي يكون الجواب ديالك ؟
راك تتعرف المغاربة عندهم طابلة موحدة في هذا رمضان..و أنا من أولاد الشعب خاصنا الحريرة ضرورية..بيض مسلوق تمر الحليب غير حنا السلاويين ضروري “الزميتة”.. و من بعد كاين العشا..
– أشنو الشهيوة لي كتقن تطيبها في رمضان ؟
كيف قلت ليك متعرف ندير والو من غير نسلق البيض..الطبخ ليس هوايتي..لكل اختصاص ناس مختصين بيه.
– أشنو تقول للمغاربة في هذا رمضان ؟
بغيت نقول للمغاربة رمضان مبارك سعيد يدخل على الجميع بالصحة و العافية، ويحفظ بلادنا و ملكنا و نترجى من الله يزول علينا هاذ البلاء و تعود الأمور إلى طبيعتها ياربي آمين.