فاجئ الفنان تامر حسني متابعيه عبر حسابه الخاص في “فيسبوك” ، بمنشور تضمن رسالة مؤثرة و قوية كوجهة الى مَن يتساءلون عن وجود الله في حل خلافاتهم.
وكتب تامر في رسالته: “في الوقت ده ناس كتير إيمانها بربنا ممكن يتزعزع أو ينهار ويقولوا طب ربنا فين مش هرد بالآيات والأحاديث عشان في ناس أحق مني يتكلموا بلغة الدين بس أنا هرد رد بسيط من واقع الدنيا، أنت لو دخلت فيلم وجالك تليفون فاستعجلت ومشيت في ربعه الأولاني هل تقدر تحكم على نهاية الفيلم؟ أكيد لأ، يعني متحكمش على حاجه لسه مش خلصانة”.
وأضاف المتحدث: “طب الدنيا لسه شغالة مخلصتش يعني متعرفش بكرا ربنا شايل إيه متستعجلش وتحكم على الدنيا وأنت لسه مشوفتش مرحلة النصر اللي ربنا وعد بيها أصلاً في قرآنه متحكمش دلوقتي حكمك هيكون غلط إحنا لسه مكملناش الدنيا للآخر، يمهل ولا يهمل واللي راحوا دول جريوا على الجنة اللي هي الحياة الأساسية حياة الخُلد راحوا دار الحق ومشيوا من دار الباطل”.
واختتم تامر حسني تدوينته قائلا : “يا جماعة الدنيا دي ولا حاجة دي دار باطل فيها الشر والكره والحقد والظلم، لكن الناس دي راحت لحياة كلها حب وخير وسلام وفرح ولما في الآخرة نشوف كل حد كانت حياته صعبة ومليانة معاناة إزاي ربنا كافئه على صبره وتحمله من كل اللي شافه وكرمه بأجمل نعيم الجنة هنقول ياريتنا كنا إحنا، الصبر يا جماعة والثقة في وعد ربنا. الدنيا دلوقتي وسكان الأرض انقسمت 2، ناس إيمانهم راح وناس اتمسكوا بعقيدتهم أكتر ودول أول ناس كسبوا معركة الدنيا، ثقوا في كاتب الدنيا العظيم أنكم لازم هتسقفوا في النهاية من حلاوة نصره وهو بينصر المظلوم بمعجزة من عنده تتحقق في الوقت المناسب اللي يعلمه هو مش إحنا والله والله والله لازم يبقى معندناش شك نهائي في رحمته وفضله اكسبوا المعركة يا جماعة إوعوا إيمانكم بربنا يتهز إحنا كلنا أصلاً عايشين في اختبار ولازم ننجح فيه إن شاء الله هتشوفوا بعنيكم أكبر رد من ربنا كما وعد في قرآنه الكريم ثقوا في الله إن وعد الله حق”.
