من خلال فقرة “مشاهير في الكوزينة”، نقدم لكم متتبعات جريدة”خميسة.ma”، و قُراء “le12.ma” عربية، خلال الشهر الفضيل الوجه الآخر لمشاهير من شتى المجالات، و علاقتهم مع المطبخ خاصة خلال شهر رمضان الكريم الذي يتطلب تعاون الزوج و الزوجة في تحمل أعباء “الكوزينة”.
حلقة اليوم مع أشهر نجوم الويب المغربي و أحسن كوميدي سنة 2014 : سيمو السدراتي
– بداية بغينا نعرفوا واش كتعاون عائلتك في الكوزينة في رمضان ؟
ضروري..تنعاونهم في مشاغل الكوزينة مرة مرة و مشي غير في رمضان حتى في الأيام العادية..أما دابا أي حاجة ساهلة تنديرها معاهم شلاضة و عصير ونعمر معاهم “البطبوط معمر” ماشي تنصايب البطبوط غي تنعمرو هههه..
– إلا سولناك أشنو تتوجدوا لطبلة رمضان، أش غادي يكون الجواب ديالك ؟
ضروري يكون البغرير و الزبدة والعسل اما الشي الأخر عادي انا تنبغي كل شيئ مفرق بحال البريوات و التمر و الحريرة مرة مرة مشي كل نهار…ولكن حنا تنتعشاو عليها الفطور متنكلش فيه بزاف..
– أشنو الشهيوة لي كتقن تطيبها في رمضان ؟
كيف قلت ليك أي حاجة ساهلة تنديرها تنعرف نعمر البطبوط و نقطع شلاضة، نصايب عصير..و معنديش مع الصعيب بحال الطاجين يعني بيني و بين الطبخ غير الخير و الإحسان..
– أشنو تقول للمغاربة في هذا رمضان ؟
بغيت نقول للمغاربة رمضان مبارك وأتمنى هاذ العشر الأواخر تدخل عليهم بالهنا وراحة البال وبالصحة و طول العمر.. كما استغل الفرصة ونقول للمغاربة كاملين عيد مبارك سعيد.. ولا تزعلو من الحمقى المشاهير هههه